六個月大的BB食粥仔唔係太多選擇, 因為BB岩岩開始試食半固體食物, 又要睇下佢D便便靚唔靚。
BB的便便軟軟地就為知靚, 如果你BB的便便係軟軟地, 就算2-3日先去一次都唔緊要, 咁只係代表左佢吸收得好, 好多BB都比較鐘意食糊仔, 始終糊仔的口感都比粥仔軟滑。如果BB唔鐘意食, 千祁唔好迫佢, 過多一個星期再試。
如果BB的便便比較硬, 佢去便便時又好似要好出力 (渣住個拳頭仔, 面仔通紅),可以試煲開奶茶或生熟意米水, 如果佢冇以上的情況, 就唔駛煲俾佢飲。
BB開始試肉類的第一選擇通常都係用豬肉和魚肉, 菜類可以選擇由黃色蔬菜開始。例如: 甘筍, 蕃薯, 粟米蓉。另外6個月後就可試俾白麵包, 9個月後可試俾ABC粉。
BB食蔬菜可依這個程序: 甘筍/南瓜、薯仔/蕃薯、青豆、西蘭花/椰菜花。
初試半固體食物一般不會給BB食綠葉菜，因為纖維較多，很難消化。 到BB 7至9個月吃粥仔可加菠菜茸(用葉打碎)，不過要留意同一餐不須有鈣質食物，因為會形成草酸鈣。另外可給一條烚過的菜心BB當零食，可訓練牙力又可啜汁。
BB食譜大全
肉類: 肉片 / 牛肉 / 魚 / 鴨腎 / 鴨心 / 雞肉
瓜類: 冬瓜 / 節瓜 / 蕃茄 / 紅蘿蔔 / 木瓜 / 南瓜 / 薯仔 / 粟米
蔬菜: 菜心 / 菠菜 / 青豆 / 白菜 / 西蘭花 / 小唐菜
另類: 雞蛋 / 芝士 / 蜜棗 / 淮山 / 龍牙百合
豬肉用水柳、雞胸肉、牛肉等切碎。
魚可以用三文魚、白飯魚、沙猛魚、大眼雞等容易起骨的魚。
白飯魚可買好細條, 好似牙簽咁幼的, 先煮熟魚, 不一定要用攪拌機, 可用匙壓成茸就得。
另外注意最好一歲後先食以下食物,包括:
蕃茄、洋蒽、包心菜、十字菜花(e.g. 西蘭花，椰菜花)、奇異果、橙、蜜瓜、士多啤梨、蛋白、牛奶、花生、果仁、朱古力、色素、調味料、有氣飲品。
煲粥速成法
1. 先將一至兩湯匙米洗淨，然後放入真空焗杯 / 真空壺。
2. 加入100。C 滾水 (90%滿), 焗 2-3小時。
3. 打開真空壺 / 焗杯，米已經開花變成爛飯，把飯連水倒入煲內（可用瓦煲)，再加小小水，細火煮約8至10分鐘。
註:
1. 有泡升起時，可以加入肉蓉 / 菜蓉 / 水果蓉，再多滾多一陣即可。
2. 用瓦煲記住睇火，否則很易燶。
如果要整俾六個月大至九個月大的BB食, 可試以下款式:
粟米蓉
用滾水煮粟米, 大概30分鐘, 之後將條粟米用研磨器磨蓉, 磨完跟住再用個隔渣隔一隔佢, 層衣就自然會被隔出, 然後用攪拌機打碎, 之後可以加入粥仔之中再煮就食得。跟住個粟米心唔好浪費, 可以拎去煲湯。
青豆蓉
用滾水煮熟青豆(可用蜜糖豆除去豆夾, 不過份量會比較少), 之後將青豆加水用攪拌機打成蓉, 可加入1至2湯匙奶米粉攪拌令青豆蓉更杰身及增加口感。
蛋黃蓉
6個月可食熟蛋黃，初時一日只可吃1/3個。後來可一日一個，一個星期不可多過3個。先將雞蛋烚熟, 去殼去蛋白, 壓成蛋黃蓉, 到粥仔差唔多煲好, 就加入蛋黃。
九個月之後先可以試食蛋白。九個月大之後, 可以先用四分之一隻蛋白, 加入蛋黃一起攪拌, 到粥仔差不多煮好, 就可以加入準備好的雞蛋汁再煮, 直到蛋花都煮熟就食得。
瘦肉味甘筍粥仔 / 節瓜粥仔
米1湯匙、水10-12湯匙、甘筍1/6條或節瓜2吋厚去核、瘦肉1安士 (一隻麻雀大小)
1) 甘筍/節瓜去皮切開4-5粒，瘦肉切粒。
2) 水加洗淨的米加甘筍/節瓜一齊燉1.5小時。
3) 瘦肉棄去，甘筍/節瓜用研磨器壓成茸加粥仔內即可。
註:
1) 甘筍細細條，甜D，易稔。紅蘿蔔是用來煲湯那種。
2) 燉粥好處是冇咁熱氣又唔駛睇火。
3) 如果明火煮，米最好先用大滾水(3湯匙)焗。另外用10-12湯匙水把甘筍/節瓜及肉煮至出味(大慨15分鐘)，用這些煮好的湯加埋頭先的米同水一齊煲30分鐘。
4) 煲完大概有成6-8湯匙粥。
淮山粥仔
如果煲淮山粥仔, 可以用野山淮山(黃色)磨成粉, 一匙羹淮山粉, 凍水連米一同落, 煲好就食得。(另外可以加瘦肉)
蜜棗粥仔
一至兩粒蜜棗, 洗乾淨, 凍水同米一齊落, (只食味, 蜜棗唔俾BB食), 煲好就食得。 這味粥仔可以去痰火, 如果BB岩岩起啖又或者傷風尾有幾聲痰聲, 食這味都幾好。亦都可以加入龍牙百合, 先洗一洗百合, 然後浸佢半個鐘與蜜棗同下。
蔬菜豬肉粥仔
豬肉可以生切碎後煮或煮熟肉片後再攪蓉落粥再煮。可用攪拌機整生豬肉蓉後, 放落粥前用小小水撈混, 豬肉會自然散開。又可先蒸熟幾片肉片, 加水用攪拌機攪蓉就煲得粥, 最尾加埋菜蓉滾下就得。
蔬菜先只用葉﹐可以切蓉後落在差不多煲好的粥繼續煮或分開煮熟再切蓉落粥都得。
菠菜魚肉粥仔
做法好簡單, 首先將魚蒸熟, 去骨後將魚肉整碎。
至於菠菜只要葉, 切碎, 待粥差不多滾就落菠菜, 滾一陣最後落埋魚肉就食得。
薯仔粥仔
基本上6個月的BB都可試食薯仔蓉, 不過因為六個月大的BB剛開始試半固體食物, 薯仔蓉比較杰身, 口感不太好, BB未必喜歡, 如試食可加入粥仔。
芝士粥仔
九個月大之後先開始試, 先煲好粥仔(肉類加菜的粥仔), 加入一粒笑牛牌芝士 (原味), 直到芝士溶入粥仔中便食得。
芝士薯蓉
先將薯仔洗淨切件, 用水烚熟或者隔水蒸熟,然後趁熱用湯匙泥爛薯仔(或用攪拌機加奶粉開的奶一起攪拌整成蓉), 再將芝士放入, 熱力就會將芝士整溶, 最後開1至2安奶溝稀薯蓉。
鴨腎鴨心粥仔
鴨腎同鴨心都有去奶積的功效, 又係食味唔食材料的。洗鴨腎要去除所有黃衣, 洗鴨心要去血, 用鹽洗就最好的但要記住過清所有鹽。洗乾淨後就煲得粥。
冬瓜雞肝蓉
好似滾湯一樣, 將半斤冬瓜及兩隻雞肝放落滾水, 當冬瓜軟化了, 就取出一隻雞肝及適量的冬瓜用匙羹整碎就可以給BB食, 湯都可以飲。
牛奶麥皮(九個月大用)
麥皮: 可用老人牌即食麥皮
奶: 用奶粉開3安奶代替鮮奶
煮法:
先將水煮滾, 加入麥皮及材料(蕃茄及牛肉 / 南瓜及雞肉), 煮十分鐘之後, 熄火, 待涼後放入攪拌機攪碎, 再倒返入煲再煮, 呢次就要煮耐少少, 大概要30分鐘, 又係用大火煮滾, 再用細火慢慢煮,一路煮的時候, 可以自己試下麥皮夠唔夠滑身。(口感似濃湯) 煮好之後熄火, 食得。
百德阿姨ABC粉 / ORGANIX ABC PASTA FOR BABY(九個月大用)
ABC粉已經好細粒了, 不用再加工整爛, ABC粉過冷河後,可用剝了皮的蕃茄去核切粒, 加些肉碎滾一會兒, 出了味之後再加回些ABC粉落去讓ABC粉可索到些湯味, 這樣便不用在餵BB時咁容易滴到週圍都係湯。蕃茄買圓扁形那隻會甜些, 另外椰菜滾些湯也很好味的。
煮法:
1) 先煮滾水, 水滾後加入半碗ABC PASTA, 不要蓋上因為好易起泡, 除除攪拌, 約 5-7分鐘, 見ABC粉開始軟身, 就可以取出, 過凍水。
2) 煮湯底,用大地魚肉乾放入滾水中先煮15分鐘, 取出魚肉, 再加入材料, 當材料熟透之後, 就再加入ABC粉煮到熟透, 然後就焗一焗, 食得。
湯底
煲粥仔最簡單的方法, 係先煲個湯底, 然後用湯黎煲粥仔。
湯底方面, 可以有以下選擇。
大地魚加: 節瓜+肉碎 / 冬瓜粒+肉碎 / 菠菜+牛肉
(大地魚肉乾用白鑊烘乾, 放入冰箱, 要煮湯底時加一片)
蕃茄+牛肉
紅衫魚+紅蘿蔔+蕃茄 (煎魚時可以俾薑去腥味, 薑只係加一片入湯之中)
生熟薏米水
我就系放五分一生薏米(一包的)，三分二熟薏米(一包的)，生薏 米唔好放咁多，好涼的，對腎唔好，特別系男仔。滾左後再煲四十分鐘左右 。煲好後有三四次開奶的份量放暖壺，如果煲多左都可以當水比佢飲。
没有评论:
发表评论